2006-7-2 11:14 PM
eric
午夜的士客
午夜的士客
時間：99年8月15日‧地點：洪水橋‧人物：的士佬
呢個經歷係個的士佬話我知。有次佢o係旺角載一個男客。嗰個人著住黑色衫，耷低頭，唔多出聲，只聽見佢一上車就好飄咁講o左句話，的士佬聽到係洪水橋，但係唔肯定，咪問佢：「係咪洪水橋呀？」佢冇出聲，個的士佬咪車佢去囉。
入到去，佢駛入條單程路，前面係掘頭，個的士佬問佢：「你想o係邊度落？」個男人又唔答佢，的士佬咪話：「你唔出聲我o係呢度停畀你！」個男人落車後，的士佬望向後睇位，想倒後駛轉返出去，點知倒頭睇完再轉返到望，竟然唔見o左個男人。一條直路一眼望晒，根本冇可能走得咁快！
個的士佬驚到即刻狂踩油，後來同行家講，原來好多人都試過同樣經歷，又係載住嗰個男人去嗰度。
李終貴按：的士佬好多時流傳好多怪異傳說，好多時都係見到舞女鬼魂，大概覺得舞女好多時冇好收場。終貴聽過有個的士佬晚晚載個舞女返屋企，但係有晚個舞女被人追債斬死o左。
個的士佬有次經過尖沙咀，離遠竟然見到呢個舞女截車。佢好驚，當睇唔到照過。佢以為冇事，但係竟然o係倒後鏡見到個舞女坐o係佢後面。
佢即刻唸經，個舞女話：「我冇啖好食呀，你幫吓我。」個的士佬第二日即刻燒衣紙同佢做o左場法事。